Konm in pié d'bwa
Konm in pié d'bwa
Lontan nad moun té di konm sa,
In marmay lé konm in piéd'bwa;
Fo drès ali kan li lé pti,
Si li la pous tort i giny pi.
Si li la pous tort i giny pi.
Navé sertin paran té i drès,
Zot z'anfan san mèt la tandrès.
I fo dir kan zot lété pti,
Zot lavé giny kout fouèt osi.
Zot lavé giny kout fouèt osi.
Koméla sé nou k'lé paran,
Nou amont viv nout bann z'anfan;
Amont viv, sé konm sa i di,
Le mo drésé oubli a li.
Le mo drésé oubli a li.
Fo viv dan la trankilité,
Evit batay, évit krié,
Pars la violans i blès li;
Konm siklone, i ravaj son vi.
Konm siklone, i ravaj son vi.
San la pli néna la séchrès,
San la tandrès na la détrès.
I fo na l'amour dan nout vi;
San l'amour lo kèr i égri.
San l'amour lo kèr i ègri.
Teddy Gérard